Иммуномодулятор үйлдэлтэй бэлдмэлийн нөлөөг малын дархлааны үзүүлэлтүүдтэй холбон судлах
Салбар : Хөдөө аж ахуйн (ХАА) шинжлэх ухаан
Төслийн дугаар : 022
Төслийн төрөл : Сэдэвт ажил
Хугацаа: 2012-2013
Санхүүжилт: 20000.00 мян.төг
Түлхүүр үг : Иммуномодулятор, дархлаа, нүцгэн ортууз, хордлого, макрофаг, лимфоид эс, харх, гистологи,
Үр дүн
1. Хордлогын шинж тэмдгээр өвчилсөн хонь, ямааны цагаан эсийн дундаж тоо хэвийн хэмжээнээс их, улаан эсийн дундаж тоо хэвийн хэмжээнээс доош буусан байгаа нь архаг хордлогын шинж тэмдгийг харуулж байна. Нэг улаан эсэд агуулагдах гемоглобины дундаж хэмжээ буюу пикограмм, цусны өнгөний үзүүлэлт өссөн нь хэт будагдалт (гиперхромия) буюу чөмөгний хордлогын цус багадалтын шинж юм. Цагаан эсийн бичээсэнд байгаа эозинофилийн тоо олширсон нь нүцгэн ортуузын хордлогын үед харшлын урвал бие махбодид явагддаг байна.
2. Нүцгэн ортуузын хордлого нь нийлбэр алкалоидоор нөхцөлдөн үүсч, малын дээд мэдрэлийн тогтолцоонд нөлөөлж бага тархины Пуркиньегийн эсийн сөнөрөл, тархины эсүүд (астроцит, микрогли) олшрох, Пуркиньегийн эсээс гаралтай аксон болон миелинүүд уусч алга болох зэрэг эмгэг өөрчлөлтүүд үзүүлэх ба энэ нь малын бөгсөн биеийн саажилт, шилэн хүзүүний таталтаар илэрч улмаар үхэлд хүргэж байгааг гистологийн аргуудаар баталгаажуулсан.
3. Дархлаа тэтгэх,үрэвсэл намжаах, бодис солилцоог тэтгэх үйлчилгээтэй бэлдмэлүүдийг нүцгэн ортуузын ургалтаас өмнө (5-6 дугаар сард) малд олгоход хордлогыг 66,6 хувь бууруулах боломжтой нь туршилтаас харагдаж байна.
4. Туршилтын 2 бүлэг болон хяналтын эерэг бүлгийг хяналтын сөрөг бүлгийн эрүүл хархны эмгэг бие бүтцийн үзүүлэлттэй харьцуулахад дэлүүний таславчийн хана зузаарч, гөлгөр булчингийн эд түрж ургасан бөгөөд тунгалагийн зангилаанд холтослог болон тахирлаг давхаргад торлог дотор хөхөлжин эсүүд түрж ургасан байсан.
5. Иммуномодулятор бэлдмэл олгосон туршилтын 1,2-р бүлгийг хяналтын эерэг бүлгийн хархтай харьцуулахад туршилтын бүлгийн хархны тунгалагийн зангилаанд лимфойд эс, дэлүүнд макрофаг эсүүд олширч, үрэвслийн процесс буурч байсан. Хяналтын эерэг бүлгийн хархнуудад улаан эсийн хэмжээ буурч цус багадалтын хам шинж явагдаж байгаа нь ажиглагдсан. Мөн туршилтын 2 бүлгийн харханд иммуномодулятор бэлдмэлийн нөлөөг шингэний дархлааны хариу урвал эрчимжиж байгаа туршилтын дүнгээр тогтоолоо.
6. Иммуномодулятор үйлдэлтэй бэлдмэлийг хорт ургамлын хордлогын үед шинж тэмдгийн эмчилгээний бэлдмэлүүдтэй хавсран хэрэглэхэд биемахбодиос хорт бодисыг гадагшлуулахад болон саармагжуулахад илүү үр дүнтэй болохыг бидний судалгааны ажлын дүн харуулж байна