Д аминдэмийн дутагдлаас сэргийлэх амьтан, ургамлын гаралтай тосон түрхлэгийг үйлдвэрлэлд нэвтрүүлэх туршилт судалгаа
Салбар : Анагаах ухаан, эрүүл мэндийн шинжлэх ухаан
Төслийн дугаар :
Төслийн төрөл : Сэдэвт ажил
Хугацаа: 2018-2020
Санхүүжилт: 44,000.0 мян.төг
Түлхүүр үг : 25(OH)Д, чацарганы үрийн тос, тосон түрхлэг, Д аминдэм, Д аминдэмийн дутагдал, HPLC, ELISA
Үр дүн
1. Адууны өөхлөг эдийн тос, үхрийн чөмөгний тос, тэмээний чөмөгний тос, чацарганы зөөлөн эдийн тос, чацарганы үрийн тоснуудыг метанол, ацитонитрил уусмалд уусгаж SUPELCOSIL TM LC-18 (250 мм, 4.6 мм, 5 мкм) HPLC багана ашиглан өндөр нягтралт шингэний хроматографын аргаар 98% цэвэршилттэй стандарт Д2, Д3 аминдэмийн стандарт утгатай жишиж Д аминдэмийн хэмжээг үнэлсэн.
Стандарт Д аминдэмийн агууламж 15 минутанд хамгийн их тодорхойлогдож байв. Адууны өөхлөг эдийн тосонд 0.175мг/гр (70 ОУН/гр), үхрийн чөмгөнд 0.141мг/гр (56.4 ОУН/гр), тэмээний чөмөгний тосонд 0.129 мг/гр (51.6 ОУН/гр), чацарганы зөөлөн эдийн тосонд 0.462 мг/гр (184.8 ОУН/гр), чацарганы үрийн тосонд 5.126 мг/гр (2050 ОУН/гр) хэмжээтэй тодорхойлогдов.
2. БНСУ-ын гоо сайхны бүтээгдэхүүний судалгаа, бүтээгдэхүүн үйлдвэрлэлийн “RNS inc” компанитай бүтээгдэхүүний найрлагатехнологийн судалгаанд хамтран ажиллалаа. HPLC шинжилгээний үр дүнгээр Д аминдэмийн агууламж хамгийн өндөр хэмжээтэй тодорхойлогдсон тос болох чацарганы үрийн тосыг 5% болон 10%-ийн агууламжтай байхаар тооцоолон тосон түрхлэг гарган авав.
Технологийн шаардлага хангасан эцсийн бүтээгдэхүүн чацарганы тосны хэмжээнээс хамаарч тод шаргалаас цайвар шаргал өнгөтэй, дунд зэргийн зуурамтгай чанартай, хурц биш анхилам үнэртэй, pH 5.5-6.0 байлаа.
3. А. Туршилтын амьтан - хулганы туршилт судалгаагаар: Туршилтын 13-17 долоо хоног дахь хугацаанд хяналтын бүлэгт Д аминдэмийн хэмжээ
дунджаар 28%-aар, сөрөг хяналт болон эерэг хяналтын бүлэгт 13-16% буурсан бол гарган авсан 5% болон 10%-ийн тосон түрхлэг түрхсэн бүлэгт уг тосон түрхлэг нь Д аминдэмийн бууралтыг зогсоож байна. Б. Эмнэлзүйн туршилт судалгаагаар: Судалгааны туршилтын бүлэгт Д аминдэмийн агууламж 0 хоногт 20.8 нг/мл, 28 дахь хоногт 16.5 нг/мл, плацебо бүлэгт 20.1 нг/мл, 9.72 нг/мл тус тус тодорхойлогдов. Туршилтын бүлгийн 0, 28 хоног дахь Д аминдэмийн хэмжээ статистик ач холбогдол бүхий ялгаагүй (p=0.24), плацебо бүлэгт статистик ач холбогдол бүхий ялгаатай (p<0.01) байлаа. Туршилтын бүлгийн ийлдсэн дэх Д аминдэмийн хэмжээ 20.7%-aар, плацебо бүлэгт 51.2%-aар буурсан байна. Энэ нь Д аминдэм агуулсан тосон түрхлэг нь Д аминдэмийн бууралтаас сэргийлэх үйлдэлтэй болохыг харуулж байна. Ийлдсийн кальци, фосфорын хэмжээ туршилтын өмнө болон дараа мөн бүлэг
хооронд статистик ач холбогдол бүхий ялгаа байсангүй.