Салбар : Хөдөө аж ахуйн (ХАА) шинжлэх ухаан
Төслийн дугаар :
Төслийн төрөл : ШУТ төсөл
Хугацаа: 2009-2011
Санхүүжилт: 135,000.0 мян.төг
Түлхүүр үг : Хурга, төлөг, сүүнхүчлийн болон пропион хүчлийн бактери, пробиотик бэлдмэл
Үр дүн
1. Пропион хүчлийн болон эслэг задлагч нянгийн массаас (50:50; 75:25) бэлтгэсэн хувилбаруудаас олгоход хурганы хөрвөжих үеийн физиологийн цус багадалт архагшихаас сэргийлэх, хөрвө хурганы угтвар ходоодны эслэг задлах чадавхийг эрчимжүүлж, витамин, нүүрс усны хангамжийг дээшлүүлэх, мөн хөрвөжих үеийн гүзээний агшилт идэвхижихийн хамт сэвсэн дэх шаахайнцарын тоо нэмэгдэхийн зэрэгцээ хоногийн нэмэгдэл жинд эерэг нөлөөлж байлаа. Судалгааны үр дүнгээр нянгуудын симбиоз үйлчилгээнд тулгуурлан “Пропио-Бак” бэлдмэлийн стандарт, “Пропио-Целло” бэлдмэлийг бэлтгэх, шалгах хэрэглэх заавруудыг боловсруулж, баталгаажуулсан.
Пробиотик бүтээгдэхүүний савлагааг капсул, шахмал хэлбэрт оруулан жилийн турш, улирлын хуваартайгаар явуулсан судалгааны дүнд (200 сая амилах чадвартай CFU/g) нунтаг хэлбэрээр 2г, 10г -аар зориулалтын нийлэг уутанд, 1г -аар (200 сая CFU/g) капсул хэлбэрийн савлагааг сонгох нь зүйтэй гэсэн дүгнэлтийг судлаачдаас гаргалаа. “Лактобактерин СТХ-II” MNS 4877-2: 2001 стандартын 8.1-ийн савлах заалтанд хүнсний нэмэлт бүтээгдэхүүний болон мал эмнэлгийн зориулалтаар 2г, 10г-аар нийлэг уутанд савлаж, амсрыг нь битүүмжилнэ” гэж нэмэлт засвар оруулан өөрчилж батлуулсан байна.
L.Reuteri LBO5 (2*108 CFU/g) агуулсан нунтаг, шахмал, капсул хэлбэрийн савлагаатай бэлдмэлийг хөрвө хурганы угтвар ходоодны эмгэгээс сэргийлэхээр олгоход уургийн нийлэгшил эрчимжиж байгааг цусан дахь шивтэр, шээгийн хэмжээ буурч, чихрийн төвшрүүлэг ихэссэнээр тайлбарлан, харин биж өвчтэй хурганд эмчилгээний зориулалтаар зохих тунгаар (2 г/өдөр тунгаар өглөө, орой дотуур) олгоход нялх үеийн хөхүүлсэний дараах ходоодны хүчиллэг чанарыг түргэн сэргээж, ходоод гэдэсний хямралд өртөхөөс сэргийлэхийн зэрэгцээ pH-ийг 16%-иар бууруулж, сүүний хүчлийн хэмжээг 21%-иар нэмэгдүүлж байна гэсэн дүгнэлтэнд хүрсэн.
Өвөл, хаврын улиралд амьдын жингийн алдагдал, уурагт нэгдлийн задралын эцсийн бүтээгдэхүүн шивтэр, хүхэрт устөрөгч мэтийн хорт нэгдлүүд нь бие махбододыг дотоод хордлогод оруулдаг байна. Иймээс өвлийн сүүлч, хаврын улиралд бэлчээрийн маллагаатай өсвөр малын бие махбодийн бодис солилцоонд ондоошилт дийлэнх болсон үед дотоод хордлогыг саармагжуулахаар 1г/кг цеолитыг ашиглахад туршлагын төлгөнд магадлалтай бууруулсан нь лабораторийн туршилтын дүнгээр бататгаж байна. Дотоод хордлогоос сэргийлэх зорилгоор байгалийн Цагаанцавын “Цеолитын нунтагийг” хэрэглэх аргыг боловсруулан баталгаажуулав.